நாலு பேருக்கு ஒரு தட்டு சாப்பாடு எப்படி சார் பத்தும்! – “யார் இவர்கள்” பட டீசர் வெளியானது!

தமிழ் சினிமாவின் மிக முக்கியமான இயக்குனர் பாலாஜி சக்திவேல். சாமுராய், காதல், கல்லூரி, வழக்கு எண்18/9 என்று அவர் இயக்கிய படங்கள் அத்தனையும் முத்தான படைப்புகள். அது மட்டுமின்றி அவருடைய கூட்டாளி ஒளிப்பதிவாளர் விஜய் மில்டனுடன் இணைந்து பணியாற்றும் மூன்றாவது படம். அதனாலயே படத்திற்கு நல்ல எதிர்ப்பார்ப்பு உள்ளது.

இன்று (ஜூன்7) யார் இவர்கள் படத்தின் டீசர் வெளியாகி உள்ளது. யார் இவர்கள் என்ற தலைப்புக்கு ஏற்றபடியே வட இந்தியாவிலிருந்து தமிழகத்திற்கு பஞ்சம் பிழைக்க வந்த பெச்சிட் விற்கும் உள்நாட்டு அகதிகளைப் பற்றி பேசுகின்ற படமாக இருக்கும் போல. ரேசன் கார்டு, வாக்காளர் அடையாள அட்டை என்று எந்த தனிநபர் அடையாளமும் இல்லாமல் வாழுபவர்கள் மீது பொய் வழக்கு தொடுத்து ஏமாற்றும் நயவஞ்சக உலகப்பற்றிய இன்னொரு படம். தமிழ்சினிமாவில் இதற்கு முன் இன்னொரு படம் வந்து உள்ளது. அது ஆந்திராவுக்கு பஞ்சம் பிழைக்கப் போன தமிழர்கள் பற்றிய படம். நீங்கள் யூகிப்பது சரிதான். விசாரணை படத்தைப் போல் பெரிய அளவில் பேசும் படமாக இருக்கும் என்று எதிர்பார்க்கலாம். காரணம், சிறைக்குள் நால்வரை அடைத்து வைத்து ஒரு தட்டு சாப்பாட்டை அவர்கள் முன் விசிறி விடுகிறார்கள். அவர்களோ ” சார்… நாலு பேருக்கு ஒரு தட்டு சாப்பாடு எப்படி சார் பத்தும்… ” என்று கேட்கிறார்கள். விசாரணை படத்தின் மூலக்கதை எழுதிய மு.சந்திரகுமாரின் லாக்கப் நாவல் படித்தவர்களுக்கு விசாரணையுடன் யார் இவர்கள் படத்திற்கு உள்ள தொடர்பு புரிய வரும்.