உங்களுக்குத் தரப்படும் மருந்துகளில் 10% போலியானவை என்றால் நம்புவீர்களா?

10-medicinal

எல்லா நம்பிக்கைகளும் அற்றுப் போன பிறகும் கூட ஒரு சாமானியன் சிறிய வைராக்கியத்துடன் சென்று சேரும் இடங்கள் இரண்டு. ஒன்று கோவில், அது ஒரு வழிப் பாதை. அங்கே அவனுக்கு தன் வேண்டுதல்களுக்குப் பதிலாக எதுவுமே திருப்பி தரப்படுவதில்லை. இரண்டாவது மருத்துவமனை. அங்கே அவனுக்குத் தரப்படுவதில் 10.5% சதவீதம் தரம் குறைந்த அல்லது போலியான மருந்துகள் என்று சொன்னால் நம்புவதற்குக் கொஞ்சம் கடினம் தான். ஆனால் நமக்கு வேறு வழியில்லை, நம்பித்தான் ஆகவேண்டும். ஏனென்றால் அதைச் சொல்லியிருப்பது உலக சுகாதார நிறுவனம் (WHO).

உலக சுகாதார நிறுவனத்தின் ஆய்வு

பொதுச் சுகாதாரம் மற்றும் சமூக பொருளாதாரத்தில் தரமற்ற போலி மருந்துகள் ஏற்படுத்தும் தாக்கம் (Public Health and socioeconomic impact of substandard and falsified medical products) என்ற தலைப்பில் ஆய்வு மேற்கொண்ட உலக சுகாதார நிறுவனம் இந்தியா உள்ளிட்ட குறைந்த மற்றும் நடுத்தர வருவாய் உள்ள நாடுகளில் பயன்படுத்தப்படும் மருந்துகள் 10.5 சதவீதம் தரமற்றவை அல்லது போலியானவை என்று கண்டுபிடித்துள்ளது.

நிமோனியா காய்ச்சலால் உலகம் முழுவதும் நிகழ்ந்த 72430 குழந்தை மரணங்களுக்கான காரணம் இந்தத் தரமற்ற அல்லது போலி மருந்துகள் தான் என்றும்,  மேலும் இந்த எண்ணிக்கை 169271 வரை அதிகரிக்கலாம் என்றும் உலக சுகாதார நிறுவனம் எச்சரித்துள்ளது.

ஜனவரி 1 2017 முதல் டிசம்பர் 31 2016வரை வெளியான நூறு ஆய்வு அறிக்கைகளை மதிப்பாய்வு செய்ய எடுத்துக்கொண்டனர் உலக சுகாதார நிறுவன விஞ்ஞானிகள். இந்தியா உள்ளிட்ட 88 நாடுகளில் இருந்து எடுக்கப்பட்ட 48218 மருத்துவ மாதிரிகள் ஆய்வுக்கு உட்படுத்தப்பட்டன. மேலும் அமெரிக்க அரசாங்கத்தால் எவரும் அணுகக்கூடிய வகையில் பராமரிக்கப்படும் (Medical Quality DataBase) என்னும் தகவல் பெட்டகத்திலிருந்தும் தகவல்கள் ஆய்வுக்கு எடுத்துக்கொள்ளப்பட்டன.

அதிர்ச்சி தரும் ஆய்வு முடிவுகள்

ஆய்வுக்கு உட்படுத்தப்பட்ட 48218  மருத்துவ மாதிரிகளில் கிட்டத்தட்ட 5094 மருத்துவ மாதிரிகள் தர பரிசோதனையில் தோல்வி அடைந்தன. அப்படித் தர பரிசோதனையில் தோல்வி அடைந்த மருந்துகளில் கணிசமானவை மக்கள் மிக அதிகமாகப் பயன்படுத்தும் மலேரியா எதிர்ப்பு மருந்துகள், ஆண்ட்டி பயாட்டிக் மருந்துகள் மற்றும் ஆண்ட்டி மைக்ரோபியல் மருந்துகள் என உலக சுகாதார நிறுவனம் தெரிவித்துள்ளது.

மதிப்பாய்வு செய்யப்பட்ட நூறு ஆய்வறிக்கைகளில், மலேரியா எதிர்ப்பிற்காக எடுத்துக்கொள்ளப்படும் மருந்துகளில் 11.8சதவீதம் போலியானவை என்று தெரியவந்துள்ளது. மேலும் வலிப்பு நோய் எதிர்ப்பு மருந்துகளில் 65% சதவீதமும், பாலியல் ஹார்மோன் மருந்துகளில்56% சதவீதமும் தரமற்ற மற்றும் போலியான மருந்துகள் எனவும் ஆய்வில் கண்டுபிடிக்கப்பட்டுள்ளது.

போலியானவை என்று கண்டறியப்பட்ட மருத்துவ மாதிரிகளில் 60 சதவீதம் அரசு மற்றும் தனியார் மையங்களிலிருந்து பெறப்பட்டவை. ஆனால் போலிகளில் கணிசமான அளவுக்கு அதாவது 29சதவீதம் தனியார் மையங்களிலிருந்தே பெறப்பட்டுள்ளன.

இந்தியாவில் போலி மருந்துகள்

இந்தியாவில் மிக அதிகமாக உபயோகப்படுத்தப்படும் மருந்துகளான Combliflam மற்றும் D-Cold ஆகியவை தரம் குறைந்தவை என்று மத்திய மருந்துகள் தர கட்டுப்பாடு அமைப்பு அறிவித்துள்ளது.

‘இந்தியாவில் போலி மருந்துகள் பிரச்சனை மிகப் பெரியதாக உருவெடுத்துள்ளது. அதைத் தடுப்பதற்கான அனைத்து நடவடிக்கைகளும் எடுக்கப்பட்டு வருகின்றன. ஒரு தர நிர்ணயிப்பாளானாக, இது போன்ற போலி மருந்துகள் உற்பத்தி ஆவதையும், விற்பதையும், மக்களிடம் சென்று சேர்வதையும் தடுக்கும் வழிமுறைகளை உருவாக்கி வருகிறோம்’ என்று இந்தியாவின் மருந்து கட்டுப்பாட்டு ஜெனரல் திரு.ஜி.என்.சிங் தெரிவித்தார்.

மக்களுக்கு மருத்துவமனைகள் மீதிருக்கும் எஞ்சிய நம்பிக்கையும் பொய்த்து போவதற்கு முன்பு மத்திய, மாநில அரசுகள் போலி மருந்துகளுக்கு எதிரான நடவடிக்கைகளைக் கடுமையாக்க வேண்டும்.

 

 

Related Articles

சினிமாவில் சாதிக்க துடிப்பவர்கள் கேபிள் ... தமிழ் சினிமா துறையில் இருப்பவர்களுக்கு கேபிள் சங்கர் என்பவரை தெரியாமல் இருக்க வாய்ப்பு இல்லை. அந்த அளவுக்கு சினிமா மீது அதீத பற்று கொண்டவர். சினிமாவை ...
ரேசன் அரிசின்னா அவ்வளவு கேவலமா போயிடுச்ச... பசி காரணமாக பள்ளிக்கூடம் பக்கம் ஏழை மாணவர்கள் செல்லாமல் சிறுவயதிலயே வேலை வறுமை என்று அலைகிறார்கள், தங்கள் வாழ்க்கையை கெடுத்துக் கொள்கிறார்கள் என்ற நோக...
கிராமத்துக் குழந்தைகளின் கல்விக்காக ஒன்ப... திரைப்படங்களில் நமது கனவு நாயகன் எப்போதும் கல்விக்காக உழைப்பவர் தான். கல்வியை மையப்படுத்தி எடுக்கப்பட்ட தமிழ் திரைப்படங்கள் கணிசமான வெற்றியைப் பெற்றிர...
உங்களுக்கு குறும்படங்கள் பார்ப்பதில் ஆர்... கடந்த சில நாட்களாகவே சமூக வலைதளங்களில் சில குறும்படங்கள் பற்றிய மீம்கள் வந்து கொண்டிருக்கிறது. அந்தக் குறும்படங்கள் எங்கே உள்ளது என்று தேடிய போது அவை ...

Be the first to comment on "உங்களுக்குத் தரப்படும் மருந்துகளில் 10% போலியானவை என்றால் நம்புவீர்களா?"

Leave a comment

Your email address will not be published.


*