2019 ஆம் ஆண்டு நடக்கவிருக்கும் நாடாளுமன்ற தேர்தலில் பாரதிய ஜனதா கட்சியை வீழ்த்துவதற்காக, பகுஜன் சமாஜ் கட்சியுடனான கூட்டணி தொடரும் என்று சமாஜ்வாடி கட்சி தலைவரும் , முன்னாள் உத்தரபிரதேச முதல்வருமான அகிலேஷ் யாதவ் தெரிவித்துள்ளார். மேலும் கூட்டணியை தொடரவைக்கும் முயற்சியாக பகுஜன் சமாஜ் கட்சிக்கு கூடுதல் எண்ணிக்கையிலான இடங்களையும் கூட விட்டுத்தரத் தயார் என்று அவர் தெரிவித்து இருக்கிறார்.
தற்போதைய உத்தரபிரதேச முதல்வர் யோகி ஆதித்யநாத் பிரச்சாரம் மேற்கொண்ட தொகுதிகள் அனைத்திலும் பாஜக தோல்வியைச் சந்தித்துள்ளதையும் அகிலேஷ் யாதவ் குறிப்பிட்டுள்ளார்.
பாரதிய ஜனதா கட்சியை பொறுத்தவரையில் பகுஜன் சமாஜ் மற்றும் சமாஜ்வாடி இடையேயான இந்தக் கூட்டணியை சந்தேகத்துடனேயே அணுகுகிறது. அகிலேஷ் யாதவும், மாயாவாதியும் சண்டையிட்டுப் பிரிவார்கள் என்பதே பாஜகவின் கணிப்பாக இருக்கிறது.
உத்தரபிரதேச அமைச்சர் சுவாமி பிரசாத் மௌரிய இந்தக் கூட்டணி குறித்துப் பேசும்போது ‘இது பிரச்சனைகள் அடிப்படையிலான ஒரு கூட்டணி அல்ல. அப்படி அமையாத எந்தவொரு கூட்டணியும் நிலைக்காது. கூடிய விரைவில், அதாவது 2019 நாடாளுமன்ற தேர்தலுக்கு முன்பு அகிலேஷ் யாதவும், மாயாவாதியும் சண்டையிட்டு பிரிவார்கள்’ என்றார்.
Be the first to comment on "பாஜகவை வீழ்த்துவதற்காக பகுஜன் சமாஜ் கட்சியுடனான கூட்டணி தொடரும் – சொல்கிறார் சமாஜ்வாடி கட்சித் தலைவர் அகிலேஷ் யாதவ்"